Kavita kya lakhai.....? - Dilwali kudi ni kalme..... books and stories free download online pdf in Gujarati

કવિતા ક્યાં લખાઈ.....? - દિલવાળી કુડીની કલમે.....

આભાર સૌનો! મારી કવિતાઓને આટલો બધો પ્રેમ આપવા બદલ અને મને હજુ પણ વધારે સારુ લખવા માટે પ્રોત્સાહન અને પ્રેરણા આપવા.

લાંબી કવિતા ગુજરાતી ભાષામાં લખવાનો આ મારો પ્રથમ પ્રયત્ન છે. આશા છે કે તમને આ કવિતા ગમશે અને તમે પોતાના પ્રતિભાવ જણાવશો.

હવે હું રજુ કરુ છુ મારી ગુજરાતી ભાષાની પ્રથમ લાંબી કવિતા "કવિતા ક્યાં લખાઈ....."

કવિતા ક્યાં લખાઈ.....

બાળપણની વાતો આવી સંભળાઈ,
પ્રસંગો બાળપણના ગયા આંખે છવાઈ;
નિખાલસતાની થઈ પરખ ત્યાં ભાઈ!,
ને કલમથી ત્યાં ગઈ કવિતા લખાઈ......

શાળાના દિવસોની સુગંધ પ્રસરાઈ,
શિક્ષકની સોટી ત્યાં હાથે અનુભવાઈ;
મસ્તીની કિટ્ટા બુચ્ચાથી મિત્રતા સંધાઈ,
ને કલમથી ત્યાં ગઈ કવિતા લખાઈ......

માત-પિતાના રહ્યા સ્વપ્નો વણાઈ,
આશાને સપનાઓથી થઈ સગાઈ;
બાળકથી આશાઓ રાખી દેવાઈ,
ને કલમથી ત્યાં ગઈ કવિતા લખાઈ......

કોલેજની દુનિયામાં રહ્યું પગલું મુકાઈ,
રીત-ભાત કોલેજની જાણી લેવાઈ;
નિત-નવા સ્વપ્નો હવે રહ્યા વણાઈ,
ને કલમથી ત્યાં ગઈ કવિતા લખાઈ.....

અવનવા દોસ્તોથી ઓળખાણ બનાઈ,
મોજ-મસ્તીથી રહ્યુ સ્વાગત કરાઈ;
જીવનની નવી રીતની માળા પરોવાઈ,
ને કલમથી ત્યાં ગઈ કવિતા લખાઈ.....

યૌવનના બદલાવોની ઝલક જણાઈ,
વિચારોમાં મગજ-મન ગયું વંટોળાઈ;
નિત-નવા વિચારોના આક્રમણની નવાઈ,
ને કલમથી ત્યાં ગઈ કવિતા લખાઈ......

કેવો, ક્યારે ને કેમનો થશે? પ્રેમ હરજાઈ!,
આવા તે કાંઈક પ્રશ્નોની આફત આણાઈ!;
પ્રેમની એક નવી મનમાં દુનિયા વસાઈ,
ને કલમથી ત્યાં ગઈ કવિતા લખાઈ......

અનુભવ પહેલા પ્રેમનો ક્યાંથી જશે અંજાઈ?,
લાગણીનો દીવો આપમેળે જાશે પ્રગટાઈ!;
ખબર કેમની પડશે પ્રેમમાં જવાયું ખેંચાઈ?,
ને કલમથી ત્યાં ગઈ કવિતા લખાઈ......

પહેલી પહેલ કોની થશે? એ પ્રશ્ન રહ્યો પુછાઈ,
કેવી હશે એ ક્ષણ? તેની કલ્પના ગઈ કરાઈ;
આતુરતાથી આ ક્ષણોની રાહ રહી જોવાઈ,
ને કલમથી ત્યાં ગઈ કવિતા લખાઈ......

નયનમાં આવી ગયું કોઈ સંતાઈ,
ધડકનની પણ ક્ષણમાં ગતિ પલટાઈ;
ભાવનાઓ એના આવતા ભીંજાઈ,
ને કલમથી ત્યાં ગઈ કવિતા લખાઈ......

નિખાલસતાની એવી સુંગધ પ્રસરાઈ,
ઈશારાઓથી પ્રેમના રંગે ગઈ રંગાઈ,
ભોળા હૃદયના ભોળપળમાં ભોળવાઈ;
ને કલમથી ત્યાં ગઈ કવિતા લખાઈ......

પ્રેમગીતમાં રહી લાગણીઓ કહેવાઈ,
પ્રેમના રાગમાં ગયુ સંગીત પરોવાઈ;
પ્રેમના તાલમાં તાલબદ્ધ થઈ શરણાઈ,
ને કલમથી ત્યાં ગઈ કવિતા લખાઈ......

જીવનની ઘટમાળ પ્રગતિએ પ્રેરાઈ,
મુશ્કેલીનો સામનો કરવાની વારી આઈ;
થોડું આઘુ પાછું કરી જિંદગી સચવાઈ,
ને કલમથી ત્યાં ગઈ કવિતા લખાઈ.....

પ્રેમને અને વિરહ એકબીજાના સવાઈ,
વિરહની ક્ષણોને હૈયેથી આવકરાઈ;
વિરહમાં તપે પ્રેમીઓ એ પ્રેમની કઠણાઈ,
ને કલમથી ત્યાં ગઈ કવિતા લખાઈ.....

સંસાર સાગરમાં પ્રેમના માનની લડાઈ,
નાત-જાતના ભેદની જાળ રઈ ફેંકાઈ,
અમીર ગરીબના હવે દાવા રહ્યા ઠોકાઈ,
ને કલમથી ત્યાં ગઈ કવિતા લખાઈ.....

મોભા, માન, આબરૂ ની આલી દુહાઈ,
સમાજના ડરની છબીઓ સેવાઈ;
લોક લાજ હાટુ પ્રેમની બલી મંગાઈ,
ને કલમથી ત્યાં ગઈ કવિતા લખાઈ.....

પ્રેમીઓની અમરતાની કહાનીઓ ગવાઈ,
પ્રેમને કાજ સદીઓથી પ્રેમી લડે હરખાઈ;
તોડી બધી જંજાળ જીતી પ્રેમની સચ્ચાઈ,
ને કલમથી ત્યાં ગઈ કવિતા લખાઈ.....

લગન વેળાની હવે જુએ રાહ જમાઈ,
લગ્નના તેડાની સૌને પત્રિકા મોકલાવાઈ;
આનંદના ક્ષણો જાશે મિલનમાં ફેરવાઈ,
ને કલમથી ત્યાં ગઈ કવિતા લખાઈ.....

મન-આત્માના એક હોવાની સાક્ષી પુરાઈ,
જન્મો જન્મ માટે પ્રેમીઓ ગયા બંધાઈ;
આત્માથી એક એ પ્રેમની સમાધિ ગણાઈ,
ને કલમથી ત્યાં ગઈ કવિતા લખાઈ.....

પ્રેમીઓના જીવનની ઘટમાળ બદલાઈ,
પ્રેમી યુગલમાં ગયા પતિ-પત્ની જડાઈ;
મીઠડા આ સંબંધની આપે સૌ બધાઈ,
ને કલમથી ત્યાં ગઈ કવિતા લખાઈ.....

ચિંતાની રેખાઓ કપાળ પર દોરાઈ,
આર્થિક કટોકટીની સ્થિતિ સર્જાઈ;
પ્રેમીના સાથ થી પણ, હિંમત બંધાઈ,
ને કલમથી ત્યાં ગઈ કવિતા લખાઈ.....

ખીલતા જોયું ફૂલ ને આશા ઉભરાઈ,
સ્વર્ગની અપ્સરા જાણે ઉતરી આઈ;
જોમ જુસ્સાથી ગયા વિચાર બદલાઈ,
ને કલમથી ત્યાં ગઈ કવિતા લખાઈ.....

અનુભવની લાગણીઓ રહી છલકાઈ,
જીવતા શીખ્યાની ગુંજો સંભળાઈ;
વેદના ને ખુશી રહ્યા શબ્દોમાં વણાઈ,
ને કલમથી ત્યાં ગઈ કવિતા લખાઈ.....

વય ને અનુભવ નો અંદાજ રયો કેવાઈ,
પણ હૃદયની લાગણીઓ શાને અવગણાઈ?;
એટલું કહેતા હૃદયની વેદના સંભડાઇ,
ને કલમથી ત્યાં ગઈ કવિતા લખાઈ.....

ઢળતી આંખોને જીવનની કિંમત સમજાઈ,
એટલે મૃત્યુ શૈયા પર રહી સલાહ દેવાઈ;
જીવી જાણો જીવન મળ્યું એકવાર ભાઈ!,
ને કલમથી ત્યાં ગઈ કવિતા લખાઈ.....

જીવન અમોલ એની કિંમત ક્યાં ગણાઈ?,
કિંમત ગણી બતાવે એવી રીત ન રચાઈ;
કિંમતી આ અનુભવ બોલે, માથે લે ભાઈ!,
ને કલમથી ત્યાં ગઈ કવિતા લખાઈ.....

કલ્પનાઓ ને હકીકતનો સંગમ છે ભાઈ!,
લાગણીનો શબ્દોથી ગુંથેલો હાર કવિતા ગણાઈ!;
મૃત્યુને અમરતાના શબ્દોની જરૂર જણાઈ,
ને કલમથી ત્યાં ગઈ કવિતા લખાઈ.....

- દિલવાળી કુડી

આશા છે કે મારો આ કવિતાનો ઉદ્દેશ્ય સફળ થાય. જે સંદેશ લોકો સુધી પહોંચાડવો છે તે લોકો સુધી પહોંચે. જીવનની કિંમત આંકી નથી શકાતી પણ, તે એક જ વાર મળે છે અને તેથી જ જીવન અમૂલ્ય છે. જીવનને જીવી જાણો. કોઈ પણ સંજોગોને લડત આપો હાર ન માનો. જીવન જીવવુ ને વિતાવવું આ વચ્ચેનો ભેદ બવ મોટો છે તેથી જ કહુ છુ કે, "જીવન જીવતા શીખો વિતાવતા નહિ".....

અંતે મારી કવિતાની બે પંક્તિઓથી પુરુ કરીશ કે,

"જીવનની કિંમત ને જાણી તો લો,
એક જ વાર મળે છે માણી તો લો....."


આભાર.....